უფლებადამცველი სამირა ბაირამოვა სასტიკად მოკლული მოზარდის, 14 წლის აითაჯ შახმაროვას შესახებ სოციალურ ქსელში პოსტს აქვეყნებს.
“დღეს გავიგე, რომ მოტაცებულმა, 14 წლის აითაჯმა სამჯერ სცადა სახლიდან გაქცევა. ერთხელ სახლამდეც კი მოახერხა მიღწევა. მაშინ დედამისმა უკან, ქმრის სახლში დააბრუნა. მისი იძულებითი დანიშვნის მიზანი ბიჭის
ოჯახის სიმდიდრე ყოფილა. აითაჯის ოჯახს ერთ დროს მარნეულში ქირითაც უცხოვრიათ,” – წერს სამირა ბაირამოვა.
მოკლული გოგონა აითაჯ შახმაროვა წარმოშობით დმანისის სოფელ მამიშლოდან იყო. 10 ოქტომბერს ცნობილი გახდა, რომ პოლიციამ საგარეჯოში ძებნილი მამაკაცი დააკავა. შინაგან საქმეთა სამინისტროს ცნობით, დანაშაული 20 წლამდე ან უვადო თავისუფლების აღკვეთას ითვალისწინებს.
ასევე რამდენიმე წუთის წინ ცნობილი გახდა, რომ საქართველოს პროკურატურამ 14 წლის გოგონას განზრახ მკვლელობის საქმეზე, ქორწინების იძულების და დანაშაულის შეუტყობინებლობის ფაქტებზე, მოკლულის დედას და ბიძას ბრალდება წარუდგინა. ორივე მათგანი დაკავებულია.
