თბილისში ცნობილი ბრენდის სასტუმრო HILTON-ი აშენდება

2019.06.16 20:44:27
თბილისში ცნობილი ბრენდის სასტუმრო HILTON-ი აშენდება

"საქართველოს ბანკი” აგრძელებს ბიზნესის მხარდაჭერას და ქვეყნისთვის პრიორიტეტული მიმართულებებით მნიშვნელოვანი პროექტების დაფინანსებას. ბანკი თბილისში 201 ნომრიანი, ცნობილი ბრენდის სასტუმროს HILTON-ის მშენებლობას დააფინანსებს. 5 ვარსკვლავიანი სასტუმრო კოსტავას ქუჩაზე, სოფლის მეურნეობის ყოფილ სამინისტროს შენობაში შენდება. 

 

 

 

გიორგი ფაილოძე, "საქართველოს ბანკის” გენერალური დირექტორის მოადგილე:

 

 

 

- "საქართველოს ბანკისთვის” მნიშვნელოვანია ეკონომიკურად გამართული პროექტების დაფინანსება და ბიზნესის განვითარების ხელშეწყობა, განსაკუთრებით ტურიზმის მიმართულებით. ტურიზმის ერთ-ერთი ყველაზე სწრაფად მზარდი დარგია და მოხარული ვართ, რომ სწორედ ჩვენი ფინანსური მხარდაჭერით თბილისს კიდევ ერთი 5-ვარსკვლავიანი სასტუმრო შეემატება. სოფლის მეურნეობის სამინისტროს ყოფილი შენობა წლების განმავლობაში უფუნქციოდ იყო დატოვებული, კომპანია „გრანატის“ მიერ განხორციელებული სამშენებლო სამუშაოების შემდეგ კი ძველი შენობა რესტავრაციის შედეგად ახალ სახეს შეიძენს. მნიშვნელოვანია, რომ სასტუმროს მშენებლობის პროცესში 500 ადამიანი დასაქმდა. მისი გახსნის შემდეგ კი, 300-ზე მეტი მუდმივი სამუშაო ადგილი შეიქმნება. რაც შეეხება პროექტში `საქართველოს ბანკის” მონაწილეობას, ბანკის მხრიდან პროექტის განსახორციელებლად - 32 მილიონი აშშ დოლარის მოცულობის დაფინანსება გამოიყო. ჩვენ ტურიზმის მიმართულებით აქტიური ვართ, რაც კვლევებშიც არის ასახული. ამ მიმართულებით მრავალი პროექტი გვექნება მომავალშიც, რომელთაც დროთა განმავლობაში შემოგთავაზებთ. 

 

 

პროექტის მთავარი იდეა ორი ეპოქის გაერთიანება, ძველი და თანამედროვე არქიტექტურის მქონე შენობების ჰარმონიული სინთეზია. პროექტის მიხედვით მოხდება არსებული შენობის რესტავრაცია და თანამედროვე არქიტექტურით შექმნილი შენობის მიერთება. სასტუმროში განთავსდება რესტორანი. ბოლო სართულზე კი SkyBar-ი ლამაზი ხედებითა და სპა საცურაო აუზით. ასევე, საკონფერენციო ზონები, კაზინო, რომელსაც ოპერირებას გაუწევს მსოფლიო მასშტაბით ცნობილი ბრენდი. ინტერიერის დიზაინი, რომელსაც იტალიელი არქიტექტორი და დიზაინერი Piero Lissoni  ქმნის, გამოირჩევა დახვეწილი სტილითა და ესთეტიურობით. მის დიზაინში გამოყენებულია ძველი თბილისის არქიტექტურის თემატიკა, რაც არსებულ პროექტს მეტ უნიკალურობას სძენს.

 

 

 

პროექტს საინვესტიციო კომპანია Granat-ი ახორციელებს. სასტუმროს მშენებლობისთვის 67 მილიონი აშშ. დოლარის ინვესტიცია განხორციელდება. პროექტის დასრულება 2020 წლის ბოლოს იგეგმება.

 

 

 

მერაბ ჩიხრაძე, კომპანია ,,გრანატის" თანადამფუძნებელი:

 

 

 

-პროექტი გულისხმობს ყოფილი სოფლის მეურნეობის სამინისტროში ,,ჰილტონის" ბრენდის ქვეშ სასტუმროს მოწყობას. 200 ნომრიანი სასტუმრო აბსოლუტურად განსხვავებული იქნება თავისი სტილით და დიზაინით. პროექტის უნიკალურობა გამოიხატება იმით, რომ შევინარჩუნეთ ძველი ისტორიული შენობა, რომელიც წინასაუკუნის 30-იანი წლებში აშენდა და გვერდით თანამედროვე შენობა. იქნება ორი ეპოქის არქიტექტურული სინთეზი, რომელიც ჩემი აზრით, წარმატებული და უნიკალური პროექტია ჩვენი ქვეყნისთვის და იმ სტუმრებისა და ვიზიტორებისთვის, რომლებიც მრავლად ჩამოდიან თბილისში. ვფიქრობთ, რომ პროექტი დედაქალაქისთვის ერთგვარი სავიზიტო ბარათი იქნება. საინვესტიციო ღირებულება 60 მლნ აშშ დოლარია, აქედან საქართველოს ბანკი პროექტს 32 აშშ მლნ დოლარის ოდენობით დააფინანსებს. სასტუმრო 2020 წელს უნდა გავხსნათ. 

 

 

ხუთვარსკვლავიანი სასტუმროს მოსაპირკეთებლად გამოყენებული იქნება კომპანია Lafarge-ს მიერ შექმნილი ინოვაციური საფასადე მასალა Ductal, რომლითაც შექმნილია Louis Vuitton-ის ფონდის შენობა ქ. პარიზში. პროექტის გენერალური კონტრაქტორი სამშენებლო კომპანია BBC-ია. პროექტს სამშენებლო მენეჯმენტს ბრიტანული კომპანია BHP უწევს. რაც შეეხება პროექტის დიზაინერს, პიერო ლისონის, მისი არქიტექტურული და საპროექტო ნამუშევრები მსოფლიოს მასშტაბით აღიარებულია, მათ შორის სასტუმროები:  Ritz Carlton Residences & Villas Maiami Beach; Conservatorium Hotel Amsterdam, Roomers Hotel Baden-Baden, Mamilla Hotel Jerusalem, Saint Vincent Resort Grand Hotel Billia, Shilla Stay Hotel, South Korea  და სხვა. ლისონის მიღებული აქვს მრავალი საერთაშორისო ჯილდო, მათ შორის ჯილდო საუკეთესო დიზაინისთვის,  Red Dot Award, Compasso D'Oro ADI, Elle Decor International    და სხვა.